Melrakkasetur - Fr�ttir / Heim

Takk fyrir okkur og gle�ilegt rebbasumar

Tue, 11 Jun 2013 12:14:00 +0000

Afmælishátíð Melrakkaseturs Íslands í Súðavík fór fram í blíðskaparveðri sl. sunnudag. Opið hús var frá kl. 13-17 og boðið upp á afmælistertu frá Gamla Bakaríinu sem á hafði verið teiknaður refur úr súkkulaði. Einnig bauð Ölgerðin upp á gosdrykkinn Mix. Boðið var upp á andlitsmálun, hoppukastala og lifandi tónlist auk þess sem kvikmyndin One Scene var sýnd á loftinu. Áætlaður fjöldi gesta á afmælisdaginn var um 400 manns. Stjórn og starfsmenn Melrakkaseturs þakka kærlega fyrir daginn, þetta var frábært.

Samhliða afmælisveislunni var nýjum starfsmönnum fagnað sem og framkvæmdum á lóð og nágrenni setursins. Um þessar mundir er verið að tvöfalda útiaðstöðu við setrið, byggja bogabrú yfir Eyrardalsána, endurbæta refagirðingu og eldstæði verður byggt upp við enda pallsins. Þá eru einnig í gangi framkvæmdir á lóð og bílaplani.

Stólarnir frá Sólóhúsgögn eru komnir í Rebbakaffi og þykja einstaklega fallegir og þægilegir. Þeir sem vilja tryggja sér öruggt sæti á kaffihúsinu ættu að merkja sér einn slíkan, kostar aðeins 20.000,- kr.

Fyrsta ferðin á Hornstrandir er á miðvikudaginn 12. júní en þá er haldið til Hlöðuvíkur með fjölskyldu Páls heitins Hersteinssonar. Dvalið verður í Búðabæ þar sem rannsóknirnar hófust árið 1998 og sagt er frá í bókinni "Refirnir á Hornströndum". Á laugardag verður svo farið í Hornvík til að fylgjast með ferðamönnum og refum. Með Ester forstöðumanni verða Eric Maes frá Belgíu, Chloe Natar frá Sviss, Julien Joly frá Frakklandi og Fiona Stoddart frá Skotlandi. Þau hafa öll hjálpað til í Melrakkasetrinu undanfarið og hresst upp á samfélagið í Eyrardal.

Sumarið byrjar vel í Melrakkasetri - hlökkum til að sjá ykkur

Afm�li Melrakkaseturs 9. j�n� !!

Fri, 07 Jun 2013 10:01:00 +0000

Við fögnum þriggja ára afmæli og nýjum starfsmönnum, framkvæmum á lóð og nágrenni og förum í sögulegan leiðangur ..

Sumaropnunin er nú í fullum gangi í Melrakkasetrinu og opið er frá kl. 9-22 alla daga. Sú nýbreytni var tekin upp í vor að bjóða upp á morgunverðarhlaðborð og mælum við sérstaklega með því fyrir svanga morgungesti. Nú er búið að manna stöður sumarstarsmanna setursins en hjá okkur starfa núna þau Genka Yordanova, Jónas Gunnlaugsson, Rúna Esradóttir, Snorri Sigbjörn Jónsson, Þórir Garibaldi Halldórsson. Við erum afar sæl með þetta nýja fólk enda fylgja þeim nýjir straumar og stefnur sem verða sérstaklega áberandi í Rebbakaffi í sumar...

þér er boðið í Afmæli !

Sunnudaginn 9. júní ætlum við í Melrakkasetrinu að halda upp á 3ja ára afmælið okkar og þá verður mikið um að vera í setrinu. Við verðum með opið hús frá kl. 13-17 og verður eftirfarandi á boðstólnum:

Gamla bakaríið býður upp á afmælistertu (Árni er að æfa sig að teikna súkkulaðirebba á kökuna)
Ölgerðin býður upp á sumardrykkinn Mix
Ungir og eldri tónllistarmenn spila lifandi tónlist
Kvikmyndin One Scene verður sýnd á loftinu
Andlitsmálun - allir verða rebbar
Hoppukastali handa yngri kynslóðinni 
Við munum prufa nýja pallinn okkar

Verið er að byggja fallega bogabrú við ána, farið varlega ef þið viljið skoða, nú eru miklar leysingar.
Svo er verið að endurbæta refagirðingu og eldstæði verður byggt upp við enda pallsins okkar. Framkvæmdir á lóð og bílaplani eru í gangi og verður afar glæsilegt um að litast í Eyrardal á næstunni.

Á þriðjudag kemur fjölskylda Páls heitins Hersteinssonar og mun fara með okkur í Hlöðuvík til að halda upp á 15 ára rannsóknarafmæli refanna á Hornströndum. Okkur hlakkar mikið til að fara þangað og rifja upp gamla tíma með rebbunum og ýmsar uppákomur. Sagt er frá þessum rannsóknum í bók Páls „Refirnir á Hornströndum" sem fæst í Melrakkasetrinu á sanngjörnu verði.

Sjálfboðaliðar eru mættir á svæðið en Eric Maes frá Belgíu hefur dvalið einna lengst. Chloe Natar frá Sviss er komin og verður hjá okkur í allt sumar, hún tekur hluta af náminu sínu hér hjá okkur í svokölluðu Intern prógrammi. Fiona Stoddart frá Skotlandi kom til að stúdera hagamýs með Ester en hún er auðvitað komin á kaf í refina eins og hinir. Julien Joly frá Frakklandi er blaðamaður og áhugamaður um Melrakkasetur. Öll eru þau á leið í Hornvíkina með Ester að fylgjast með refum og ferðamönnum. Svo koma fleiri bráðum til að hjálpa til í setrinu og fara í næstu ferðir sumarsins.

Nokkuð hefur verið spurt um ferðir til að skoða refi og eru þær bókaðar hjá Vesturferðum og Borea Adventures.

Semsé - mikið að gerast í Melrakkasetri
sjáumst í sumar - verið velkomin

Sumaropnun � Melrakkasetri

Fri, 31 May 2013 09:46:00 +0000

Laugardaginn 1. júní hefst sumaropnun í Melrakkasetri: við opnum kl. 9.00 og lokum kl. 22.00

Í Melrakkasetrinu er einstök sýning sem engin má missa af - melrakkinn er eitt af undrum veraldar og saga íslenskra refaveiðimanna er engu lík!

Rebbakaffi er notalegt kaffihús, þar er m.a. boðið upp á:

morgunverðarhlaðborð
rjúkandi morgunkaffi og te
súpa og nýbakað brauð í hádeginu
plokkfiskur og þrumari
gott með kaffinu
öl og aðrar léttar veigar

minjagripir, listasýningar, handverk, tónlist, leikhús og allskonar uppákomur

Nýir og „gamlir" starfsmenn taka vel á móti gestum: Genka er stormsveipurinn, Rúna er gleðigjafinn, Snorri er snillingurinn, Þórir er súpuhvíslarinn, Jónas er meistarinn, Eric er bestur og Ester er mesti melrakkinn.

Við hlökkum til að sjá þig, velkominn í Melrakkasetrið í sumar !

J�n� � Melrakkasetri

Tue, 28 May 2013 09:05:00 +0000

Í maí hefur verið opið frá 10-17 alla daga og hafa gestir okkar notið þess að fá rjúkandi heita súpu og nýbakað brauð upp á hvern dag. Alltaf er að fjölga í gestahópnum og margar þjóðir nú þegar átt fulltrúa í Melrakkasetrinu.

Eins og áður hefst sumaropnun Melrakkasetursins laugardaginn 1. júní en frá og með þeim degi er opið frá kl. 9 til 22 alla daga.

Á Rebbakaffi er boðið upp á morgunverðarhlaðborð, súpu í hádeginu og plokkfisk. Áfram verða rebbavöfflurnar okkar, hjónabandsælan og súkkulaðikaka ásamt spennandi nýjungum.

Upplýsingaveita fyrir ferðaþjóna í Súðavíkurhreppi verður starfrækt í Melrakkasetrinu í sumar. Þar fást upplýsingar um gistimöguleika, veitingar og afþreyingu í hreppnum auk annara nauðsynlegra upplýsinga sem ferðamenn þurfa á að halda til að njóta ferðarinnar sem best. Allir ferðaþjónar sem eru á skrá hjá Ferðamálastofu geta skráð þjónustu sína hjá okkur. Síminn er 456 4922 og netfangið er info[@]melrakki.is

Laugardaginn 9. júní verður þriggja ára afmælishátíð Melrakkasetursins og hefst dagskráin kl. 13. Að venju verður opið á sýninguna, veitingar og tónlistaratriði. Verið er að stækka útiaðstöðuna svo það ætti að fara vel um mannskapinn í góða veðrinu á pallinum.

Nú er nýliðun í starfsmannahópi Melrakkasetursins og einum starfsmanni fleira en í fyrra. Sumarstarfsmenn í ár eru þau Rúna Esradóttir, Genka Yordanova, Jónas Gunnlaugson, Snorri Jónsson, Þórir Garibaldi Halldórsson. Við bjóðum melrakka sumarsins velkomna. Ester Rut er forstöðumaður eins og áður og verður hún að mestu í rannsóknarverkefnum en auðvitað líka í Eyrardal að hitta gestina :-)

Ferðaþjónum í hreppnum og helstu samstarfsaðilum á Ísafirði hefur verið boðið á súpufund sem haldinn er þriðjudaginn 28. maí kl. 19.

Miðvikudaginn 29. maí kl. 20 er svo veiðimönnum á Vestfjarðakjálka boðið í heimsókn en fyrr í vetur voru veiðimenn í Skotreyn heimsóttir. Forstöðumanninum finnst svo gaman að tala um refi og þarna er hópur sem svo sannarlega nennir að spjalla um málefni refa tímunum saman :-)

Þann 11. júní verður farið í "afmælisferð" til Hlöðuvíkur með fjölskyldu Páls heitins Hersteinssonar en 15 ár eru frá því Páll Hersteinsson, Hólmfríður Sigþórsdóttir, Ester Rut og Þorleifur Eiríksson fóru norður til refarannsókna. Einnig komu við sögu í þeim ferðum Þorvaldur Björnsson, Eiríkur Gíslason og Anna Heiða Ólafsdóttir en Guðmundur Jakobsson og Reimar Vilmundarson sigldu með mannskap og farangur sumurin 1998 og 1999. Sjálfur Jón "Rebbi" Oddsson var líka með í ferð. Þessum tímamótum verður fagnað og hafa húsráðendur í Hlöðuvík veitt góðfúslegt leyfi til dvalar þar. Indriði draugur Hlöðuvíkur verður örugglega sáttur og sér okkur fyrir góðu veðri til fararinnar. Sagt er frá þessum ferðum í bókinni Refirnir á Hornströndum en hún er til sölu í Melrakkasetrinu og Vestfirsku Versluninni.

Strax í kjölfar Hlöðuvíkurferðar verður haldið til Hornvíkur með sjálfboðaliða í fyrstu rannsóknarferð sumarsins. Svo taka við nokkrar refaskoðunarferðir og frekari rannsóknarferðir. Samstarfsaðilar okkar í ferðum og rannsóknum eru Náttúrustofa Vestfjarða, Borea Adventures og Vesturferðir. Saman erum við í The Wild North og munu gæðaboðorð okkar verða prófuð á gestum og ferðaþjónum í sumar.

Von er á fjölda fólks í heimsókn, bæði sjálfboðaliðum og öðrum gestum. Það verður semsé nóg að gera hjá melrökkum báum megin Ísafjarðardjúps í allt sumar. Fylgist með fréttum á síðunni og Facebook

Velkomin í Melrakkasetrið

N� grein: kvikasilfursmengun �gnar melr�kkum vi� sj�vars��una

Tue, 07 May 2013 17:29:00 +0000

Þú ert það (og þar) sem þú étur - kvikasilfursmengun ógnar melrökkum við sjávarsíðuna

Niðurstöður spánýrrar rannsóknar sýna að melrakkar sem lifa og éta við sjávarsíðuna innbyrða hættulegt magn kvikasilfurs á lífsskeiði sínu. Vísindamenn frá Leibniz í Þýskalandi, Háskólanum í Moskvu í Rússlandi og Háskóla Íslands/Melrakkasetri eru höfundar greinar sem birt var í gær í vísindaritinu science online journal PLOS ONE, sjá: http://www.plosone.org/article/info%3Adoi%2F10.1371%2Fjournal.pone.0060879

Gerður var samanburður á þremur stofnum melrakka frá ólíkum búsvæðum. Kvikasilfur er eitt þeirra efna sem safnast upp í fæðukeðjunni og vísindamennirnir athuguðu því uppruna fæðunnar sem refirnir voru að éta. Refirnir á hinni rússnesku Commander eyju við Mednyi eyjaklasann lifa nær eingöngu á sjófuglum og selshræjum. Á Íslandi lifa refir við sjávarsíðuna að mestu á sjófugli og öðrum hafrænum fæðutegundum. Innanlands lifa refir að mestu á nagdýrum og fugli af landrænum uppruna. Mismunandi magn kvikasilfurs fannst í sýnum af þessum þremur búsvæðum. Mikið magn kvikasilfurs mældist í refum sem lifa á hafrænni fæðu, bæði á Íslandi og Mednyi.
Vísindamennirnir skoðuðu feldi af melrökkum sem höfðu verið veiddir á Commander eyju frá fyrri tímum og voru til á söfnum. Niðurstöður mælinga sýndu að refirnir höfðu einnig mikið magn kvikasilfurs á árum áður. Jafnframt var sýnt fram á að kvikasilfrið var upprunið úr fæðu refanna enda fannst mikið magn kvikasilfurs í selum og sjófuglum á rannsóknasvæðinu.
Hinsvegar vakti athygli að lítið magn kvikasilfurs mældist í refum sem veiddir voru inn til landsins á Íslandi. Fæða refa sem búa inn til landsins veldur þeim því ekki kvikasilfursmengun líkt og gerist við ströndina. Þetta gæti skipt máli fyrir heilbrigði og viðgang stofnsins og tegundarinnar þar sem stærsti hluti vestur Evrópustofnsins er á Íslandi.
Refirnir á Mednyi búa ekki við slík gæði að hafa aðgang að fæðu sem ekki er að hafrænum uppruna, þar er eingöngu framboð á sjávartengdri fæðu. Á þessu svæði varð einmitt alvarlegt hrun í stofninum fyrir 3-4 áratugum. Þó stofninn sé tiltölulega stöðugur í dag er hann afar fáliðaður og lífslíkur yrðlinga og ungra dýra lágar. Bæði ungir og eldri refir eru í undirvigt og hafa gisinn og lélegan feld.

Alex Greenwood, leiðtogi rannsóknarinnar segir svo frá: "Þegar við hófum þessa rannsókn héldum við að orsök þess hve refirnir á Mednyi væru í svona lélegu ástandi væri sýking sem hefði borist til eyjanna af mannavöldum. Við fundum þó engar vísbendingar um neitt slíkt þrátt fyrir nokkuð nákvæma athugun".
Upp frá því fór vísindamennina að gruna að eitthvað annað væri á ferðinni sem orsakaði hið lélega líkamsástand refanna.

"Ef þetta var ekki sýking, gæti þetta kannski verið af völdum einhvers konar mengunar. Okkur datt strax í hug kvikasilfur því vitað er að það hefur fundist í miklu magni í öðrum hryggdýrum, jafnvel á mjög einangruðum svæðum norður heimskautsins. Einnig er það þekkt að kvikasilfursmengun eykur dánartíðni hjá spendýrum. Þar sem kvikasilfur hefur svo slæm áhrif á heilsufar, sér í lagi hjá ungum einstaklingum, og vegna þess að refirnir á Mednyi lifa eingöngu á sjávartengdri fæðu sem okkur grunaði að innihéldi kvikasilfur, vildum við sjá samhengið milli fæðunnar og kvikasilfursmagnsins og áhrifum þess á vistfræði þessara dýra. Meginviðfangsefni þessarar rannsóknar var því að meta hvort kvikasilfursmengun úr fæðu refanna geti verið megin orsök þess að tófustofninn á Mednyi eyjum hrundi á sínum tíma", segir Gabriele Treo, annar leiðandi vísindamaður rannsóknarinnar.

Rannsóknin leiddi síðan í ljós að samband var á milli kvikasilfurmagnsins og fæðuvistfræði og landfræðilega útbreiðslu tegundarinnar. Niðurstöður þessarar rannsóknar sýna fram á að ítreka þarf kröfuna um að stöðva frekari kvikasilfursmengun í hafinu, sér í lagi vegna neikvæðra áhrifa hennar á þá rándýrastofna sem skipa efstu sætin í fæðukeðju norðurskautsins.

Sumari� hefst � setrinu

Thu, 25 Apr 2013 11:20:00 +0000

Nú höfum við opið á setrinu á hverjum degi. Við höfum opið frá 10-17 á safninu og á kaffihúsinu.
Á kaffihúsinu verðum við með orkumikla grænmetissúpu og nýbakað brauð í hádeginu, 1000 kr.
Við tökum fagnandi á móti hópum, fundahaldi á loftinu og vettfangsferðum endilega bókið ykkur í síma 8628219.

Sumarstarf � Melrakkasetri

Wed, 17 Apr 2013 10:10:00 +0000

Velferðaráðuneytið og Vinnumálastofnun standa fyrir átaksverkefni til að fjölga sumarstörfum fyrir námsmenn á vegum stofnana ríkisins og sveitarfélaga. Skilyrði fyrir ráðningu námsmanna er að þeir séu á milli anna í námi.
Melrakkasetrið tekur þátt í þessu verkefni og óskar eftir sumarstarfsmönnum sem uppfylla þessi skilyrði.

Starfslýsing:
Áframhaldandi þróun og uppbygging náttúru og menningartengdrar ferðaþjónustu í Melrakkasetri í Eyardal. Fjölbreytt starf í boði við uppbyggingu upplýsingamiðstöðvar, endurnýjun efnis, uppröðun, umhirðu og framsetningu muna á sýningu. Leiðsögn um sýningu og móttaka innlendra sem og erlendra ferðamanna. Þátttaka í að þróa, skipuleggja og framkvæma viðburði og barnaleiðsögn. Framleiðsla og afgreiðsla á handverki og heimilislegu morgunverðar- og kaffiborði, sem og þrif og umsjón. Þróun og framkvæmd umhverfis- og samfélagsstefnu, aðlögun að VAKA vottunarkerfi. Símsvörun, birgðahald, bókun á sal og leiksýningum, gerð auglýsinga, létt bókhald og aðstoð við heimasíðu ásamt öðru tilfallandi. Söfnun og miðlun upplýsinga um framboð ferðaþjónustu í Súðavíkurhreppi skv. samningi um svæðisbundna upplýsingamiðstöð.

Hæfniskröfur:
Fjölhæfni og jákvæðni. Áhugi, færni og reynsla af ferðaþjónustu. Þekking og áhugi á menningu, náttúru og villtu dýralífi, góð íslensku, ensku- og helst þýskukunnátta, hæfni í samskiptum og vilji til að miðla þekkingu, hæfileiki til að sinna fjölbreyttum verkefnum, lágmarksaldur 20 ár, þekking á tölvuvinnu og ljósmyndun. Kunnátta í eldhúsi, bakstur og framreiðsla matvæla og drykkja, vandvirkni og þrifni. Aðrir kostir: áreiðanleiki, sveigjanleiki, lífsgleði, vinnusemi og stundvísi, bílpróf.
Athugið að Melrakkasetrið er reyklaus vinnustaður.

Ráðningatími:
Ráðningartíminn eru þrír mánuðir: júní - ágúst 2013. Vinnutími getur verið sveigjanlegur og unnið er á vöktum. Opnunartími er frá 9 til 22 alla daga. Laun eru greidd skv. kjarasamningi afgreiðslufólks á gisti og veitingastöðum, sjá uppl. á heimasíðu Verkalýðsfélags Vestfjarða: www.verkvest.is. Í Súðavík er verslun, pósthús, bensínstöð og bankaþjónusta. Auk þess fjölskyldugarðurinn Raggagarður. Möguleiki er að útvega leiguhúsnæði á sanngjörnu verði. Ísafjörður er í 20 km fjarlægð og eru rútuferðir á milli þrisvar á dag.

Umsóknarfrestur er til 10. maí 2013. Umsóknum skal skila rafrænt með tölvupósti í netfangið: melrakki@melrakki.is. Ferilskrá fylgi með umsókninni.

Stefnt er að því að ljúka ráðningum um miðjan maí. Starfið hefst 1. júní en getur hafist fyrr. Öllum umsóknum verður svarað.

Ester Rut Unnsteinsdóttir, forstöðumaður

Vantar �ig s�ti ?

Mon, 15 Apr 2013 16:08:00 +0000

Síðastliðinn vetur var húsið málað og gert fínt í Eyrardal og af því tilefni keyptum við 40 stóla á viðburðarloftið. Við buðum velunnurum okkar að "tryggja sér sæti" með því að kaupa merktan stól á loftið. Penninn ákvað að styðja Melrakkasetrið með 25% framlagi fyrir hvern stól sem keyptur var. Allir stólarnir seldust og núna er búið að merkja þá alla með þeim nöfnum sem kaupendur báðu um.

Margir hafa tekið eftir nöfnum á stólunum á loftinu hjá okkur og framtakið hefur almennt verið lofað í hástert. Þetta eru líka svo flottir og þægilegir stólar og Penninn fær heiðurinn af því að ríða á vaðið - ásamt öllu því fólki sem fjárfesti í sæti á loftinu okkar.

Nú vantar stóla í kaffihúsið og þar verða vonandi bráðum forláta íslenskir stólar frá Sólóhúsgögn (www.solo.is). Þeir verða auðvitað til sölu eins og þeir sem fóru á loftið. Ef einhver sá eftir því að hafa ekki tryggt sér sæti, eða langar að eiga sæti bæði uppi og niðri, þá er hægt að panta sér stól. Verðið er kr. 20.000,- fyrir stólinn sem verður áprentaður með nafni sem kaupandi velur. Nú eru aðeins 16 stólar í boði og um að gera að ná sér í besta sætið.

Hægt er að leggja andvirði stólsins inn á Jönusjóð Melrakkasetursins og senda tilkynninguna „stóll" á netfangið: melrakki@melrakki.is - og takið fram hverjum stóllinn á að vera merktur.
Reikningsnúmer: 0154 - 15 - 250394. Kennitala: 660907-1060. Upphæð: kr. 20.000,-

Þegar greitt hefur verið fyrir stólinn verður hann merktur gefanda sem þar með á „tryggt sæti" á Rebbakaffi. Að auki fylgir gjafabréf á sýningu Melrakkasetursins og veitingar í Rebbakaffi.

Verið velkomin í Eyrardal og takk fyrir stuðninginn :-)

melrakkarnir

M� bj��a ��r s�ti - aftur ?

Tue, 09 Apr 2013 17:12:00 +0000

Nú hikar sumarið við að heimsækja okkur hingað í Súðavík en samt sem áður erum við komin í vorverkin, heldur betur. Við höfum nánast lokið við að handsauma nöfn í alla stólana sem seldust á loftið í fyrra. Þær Genka, Dagbjört, Anna Elísa, Ragnhildur, Mekkín og Herdís Mjöll hafa allar tekið upp nálina og saumað nöfn.
Margir hafa tekið eftir nöfnunum á stólunum og framtakið almennt lofað í hástert. Þetta eru líka svo flottir og þægilegir stólar og Penninn fær heiðurinn af því að ríða á vaðið - ásamt öllu því fólki sem fjárfesti í sæti á loftinu okkar.

Nú er búið að panta stóla í kaffihúsið og þar verða forláta íslenskir stólar frá Sólóhúsgögn (www.solo.is). Þeir eru hvítir og verða auðvitað til sölu eins og þeir sem fóru á loftið. Ef einhver sá eftir því að hafa ekki tryggt sér sæti, eða langar að eiga sæti bæði uppi og niðri, þá er hægt að panta sér stól. Verðið er kr. 20.000,- fyrir stólinn sem verður áprentaður með nafni sem kaupandi velur. Nú eru aðeins 16 stólar í boði og um að gera að ná sér í besta sætið. Þar sem stólarnir eru íslensk smíð er verðið hærra en á hinum influttu stólum sem fóru á loftið. Þessir eru líka niðri þar sem langflestir gestir okkar geta séð þá. Við hvetjum alla sem eiga aur í buddunni að styðja okkur í þessu máli og tryggja sér besta sætið í Rebbakaffi. Eins geta hópar eða fjölskylda sameinast um einn stól og merkt sér. Hafið samband í melrakki[@]melrakki.is og tryggið ykkur sæti. Eins og áður er það Jönusjóður sem styrkir stólakaupin og við erum þess fullviss að Jana heitin hefði haft gaman að þessu framtaki.

Það eru fleiri en Penninn og Sólóhúsgögn sem leggja setrinu lið. Sælgætisgerðin Góa sendi okkur átta stykki páskaegg af stærri gerðinni þegar okkur vantaði efnivið í leitina miklu á páskadag. Við erum þakklát fyrir stuðninginn enda ljúft að eiga góða vini í baklandinu. Þess ber að geta að páskaeggjaleitin fór vel fram, vísbendingar voru vel faldar að venju og stóðu börnin sig mjög vel í að láta foreldra sína ganga holtið og næsta nágrenni, á kafi í snjó á köflum. Þetta var hin mesta skemmtun og gott að setjast niður með kaffi og vöfflu eða mála á nokkra steina milli þess sem leitað var.

Nú hefur Melrakkasetrið gert samning við Súðavíkurhrepp um að starfrækja svæðisbundna upplýsingamiðstöð. Setrið verður opið 9 - 22 alla daga í júní, júlí og ágúst og þar verður hægt að fá upplýsingar um gistingu, veitingastaði og afþreyingu innan hreppsins og víðar. Þangað til er opið eftir samkomulagi og er yfirleitt einhver við frá 10 - 17 en annars er hægt að hringja og fá afgreiðslu.

Eins og áður er Eyrardalur til reiðu fyrir allskonar uppákomur og skemmtilegheit. Ef þið fáið hugmynd að viðburði, hafið samband og athugið hvort ekki sé hægt að framkvæma hugmyndina. Frumkvæði heimamanna er best, allir eiga að geta skemmt sér saman í Eyrardal.

Við munum fljótlega auglýsa eftir starfsfólki sem getur unnið öll þau fjölbreyttu verk sem þarf að sinna í Melrakkasetrinu næsta sumar. Fylgist með fréttum á síðunni okkar.

„gleðilegt sumar"
melrakkarnir

P�skar !

Tue, 26 Mar 2013 15:58:00 +0000

Melrakkasetrið er opið frá 12 til 18 alla páskadagana (skírdag til annars í páskum).
Boðið er upp á hefðbundna kaffihúsastemningu með rjúkandi heitu súkkulaði, kaffi og vöfflum.
Pasta fyrir þá sem vilja magafylli af léttum og bitastæðum réttum.
- svo fara allir á aldrei.is

Á páskadag fer fram hin æsispennandi páskaeggjaleit og í þetta sinn er keppnin í boði Góu :-)

Notaleg stemning alla helgina, kósí hvíld og upphitun fyrir tónleikakvöld og skíðamennsku ..

Frábærar gönguleiðir - Raggagarður og gistiheimilið Svanfjord á Langeyri

Gleðilega Páska
melrakkarnir

málsháttur dagsins: "sjaldan kemur dúfa úr hrafnseggi"