Í gær mættu hjálparhendurnar okkar til að vinna í Eyrardalsbænum. Þetta voru þau Alan, Astrid og Óli, öll frá Háskólasetri Vestfjarða (www.hsvest.is). Þau fóru strax í að hreinsa gamla viði sem síðan verður hægt að nota til að reisa vegg á efri hæðinni og stúka af skrifstofu og salerni.
Eins og áður var ekki hikað eða hangsað heldur fóru þau beint að vinna. Við náðum að smella af þeim nokkrum myndum en þau litu varla upp frá verkum sínum.
Við teljum okkur lukkunnar pamfíla að fá þessa hjálp við húsið, gott að vita að fólk sé tilbúið til að gefa okkur af dýrmætum tíma sínum.

- Að sjálfsögðu er mikið verk eftir og ef einhver getur séð sér fært að aðstoða þá er framundan verkefni við að einangra loftið en smiðirnir hans Magnúsar eru nú að gera klárt undir það. Einnig verður farið í útistörf þegar fer að hlýna og vora.
- Kaffihúsið er í vinnslu og gaman væri ef einhver sæi sér fært að sauma með okkur dúka og gardínur þegar þar að kemur.

Uri Golman, ljósmyndari okkar, kom til landsins fyrir nokkrum dögum, til að taka ljósmyndir af refum á Vestfjörðum. Tobias Mennle, sem vann mikið með okkur í fyrra við að kvikmynda lífshætti refanna fyrir þýska náttúrulífsmynd, kom líka til að halda áfram þar sem frá var horfið í fyrra. Stóð til að Uri og Tobias myndu starfa saman í þessari lotu, ásamt líffræðingnum Frank Drygala, og safna upplýsingum og myndefni um pörun og fleira sem gerist í lífi refanna á vorin.
Uri komst þó ekki til Vestfjarða í þetta skiptið því eins og alþjóð veit fór að gjósa undir Eyjafjöllum og hafa þeir báðir dvalið við gosstöðvarnar í vikunni. Við fengum þessar frábæru myndir frá Uri í sárabætur en til stóð að hann ynni sitt fyrsta refa-ljósmyndaverkefni hérlendis. Þess ber að geta að Uri var að ljúka ljósmyndaverkefni í Indíum þar sem hann vann mest með tígrisdýr. Hægt er að skoða myndir og blogg á heimasíðu Uri: www.urigolman.com