Melrakkasetrið opnar aftur um páskana eftir gagngerar endurbætur innanhúss.

Eins og kunnugt er stendur Melrakkasetrið fyrir ýmsum menningarviðburðum sem haldnir eru á efri hæð setursins í Eyrardal. Til að tryggja gestum okkar sæti þurfum við allt að 40 stóla á loftið en hingað til hafa stólar góðfúslega verið fengnir að láni í Grunnskóla Súðavíkur.

Við ætlum að bjóða velunnurum okkar að "tryggja sér sæti" með því að kaupa merktan stól á menningarloftið okkar. Penninn hefur ákveðið ríða á vaðið og styðja Melrakkasetrið með 5.000,- kr. framlagi fyrir hvern stól sem keyptur verður.

Nú leitum við til fleiri velunnara, bæði einstaklinga og fyrirtækja sem vilja styðja við starfsemi setursins og hjálpa okkur að kaupa stóla á loftið. Verðið fyrir hvern stól er 15.000,- kr.

Þegar greitt hefur verið fyrir stólinn verður hann merktur gefanda sem þar með á „tryggt sæti" á menningarloftinu. Að auki fylgir gjafabréf á sýningu Melrakkasetursins og veitingar í Rebbakaffi.

Hægt er að leggja andvirði stólsins inn á styrktarsjóð Melrakkasetursins og senda tilkynninguna „stóll" á netfangið: melrakki@melrakki.is - og takið fram hverjum stóllinn á að vera merktur.
Reikningsnúmer: 0154 - 15 - 250394. Kennitala: 660907-1060. Upphæð: kr. 15.000,-

Kynntu þér starf Melrakkasetursins hér á síðunni:
Melrakkasetur Íslands ehf er rannsókna- og fræðasetur með „non-profit" stefnu. Hluthafar eru 58 talsins, einstaklingar, fyrirtæki og sveitafélög. Allir styrkir og ágóði af sölu aðgöngumiða og veitinga fer í að byggja upp sýninguna og sinna rannsóknum. Opið er í Melrakkasetri frá 10-22 alla daga frá 1. júní til 15. ágúst. Á páskunum er opið frá Skírdegi til annars í páskum frá 12-18 en annars er opið samkvæmt samkomulagi. Á lofti Melrakkasetursins er ágæt aðstaða til fundahalds og við tökum vel á móti öllum gestum.

Nánari upplýsingar fást hjá Ester Rut Unnsteinsdóttur, forstöðumanni, í síma: 862 8219 eða með tölvupósti á netfangið: melrakki@melrakki.is

Hlökkum til að sjá ykkur !

Í mars á sl. ári komu þau Orsolya og Erlend Haarberg til að Ljósmynda tófur að vetrarlagi.
Þau voru að safna efni fyrir ljósmyndabók um Náttúru Íslands fyrir National Geographic.
Bókin kom út í haust og hafa bæði fengið Verðlaun, lof og prís fyrir fallega bók og glæsilegar myndir.
Unnur Jökulsdóttir ritaði textann en hún hefur áður unnið með ljósmyndurum í slíkum verkefnum.

Í janúar 2012 birtist syrpa af tófumyndum þeirra í BBC tímaritinu Discover Wildlife, myndirnar eru einnig komnar á netútgáfu tímaritsins.
Við erum að vonum stolt af þeim Haarberg hjónum og að hafa veitt þeim aðstoð við texta og tökur. Tófurnar "okkar" hafa svo sannarlega sigrað heiminn og við bíðum spennt eftir að sjá hverjar viðtökurnar verða.

Hægt er að skoða bókina á síðu þeirra: http://www.haarbergphoto.com/books
Tímaritið með myndasyrpunni er hér: http://www.discoverwildlife.com/gallery/arctic-fox-photo-gallery-orsolya-and-erlend-haarberg

Annáll Melrakkasetursins fyrir árið 2011 er hægt að skoða hér á síðunni