Tæplega tvö hundruð manns komu í heimsókn í Melrakkasetrið á eins árs afmælinu okkar. Við buðum upp á afmælistertu frá Gamla bakaríinu, vöfflur og fleira góðgæti,  kaffi, te og Mix frá Ölgerðinni.

Einnig voru frumsýndar heimildarmyndir Tobiasar Mennle og Marie Helene Baconnet sem voru að hluta til teknar í Hornstrandafriðlandi með okkar aðstoð.  Var folk almennt ánægt með myndirnar og fengum við nokkrar fyrirspurnir um hvort hægt sé að fá þær keyptar. Við ætlum að athuga það en myndirnar verða sýndar daglega á setrinu í sumar.
Michelle og Eggert Nielson tóku lagið um fimm leytið og tóku gestir hraustlega undir, gaman að því.

Starfsfólkið okkar stóð sig með prýði á þessum annasama degi  og sjálfboðaliðarnir létu ekki sitt eftir liggja og stóðu menn í vöfflubakstri og uppvaski frameftir kvöldi.

Við þökkum þeim sem komu í heimsókn eða sendu kveðjur - það er notalegt að finna slíkan hlýhug svona þegar sumarið er að fara í gang.  Við hlökkum til að sjá ykkur öll aftur, verið velkomin.

Annan í hvítasunnu, mánudaginn 13. júní, kl. 1-5 ætlum við að fagna því að eitt ár er liðið frá opnun Melrakkaseturs Íslands í Eyrardal, ótrúlegt hvað tíminn líður hratt.

Þennan dag verður opið hús í Melrakkasetrinu og frítt inn á sýninguna. Við bjóðum gestum upp á kaffi og afmælisköku og svo býður Ölgerðin upp á mix, sem er sumardrykkurinn okkar í ár.

Einnig verða frumsýndar þrjár heimildarmyndir sem Melrakkasetrið aðstoðaði við tökur á í Friðlandi Hornstranda. Framleiðendur eru frá Frakklandi og Þýskalandi og voru myndirnar sýndar í sjónvarpinu í þessum löndum á síðasta ári.

Afmælishátíðin stendur frá eitt og klukkan fimm stíga Eggert og Michelle á stokk og spila og syngja fyrir okkur í tilefni dagsins.

Hlökkum til að sjá þig

-          Melrakkarnir